ही रामनाम नौका भवसागरी तराया

ही रामनाम नौका | भवसागरी तराया ||धृ||
मद, मोह लोभ सुसरी | किती डंखिती विषारी |
ते दुःख शांतवाया | मांत्रिक रामराया ||१||
सुटले अफाट वारे | मनतारू त्यात बिथरे |
त्या वादळातुनी या नेईल रामराया ||२||
भ्रम भोवऱ्यात अडली | नौका परी न बुडली |
धरुनी सुकाणू हाती | बसलेत रामराया ||३||
आम्ही सर्वही प्रवासी | जाणार दूरदेशी |
तो मार्ग दाखवाया | अधिकारी रामराया ||४||
हा देह नाशीवंत | जाण्यास ना समर्थ |
तारी तारी रामराया | दिनदास लागे पाया ||५||