कार्यकर्ता - हितोपदेश

कार्यकर्ता - हितोपदेश

खूप काम करावे । परिचय संबंध वाढवावे । धनिष्ट मित्र बनवावे । कार्यकर्ते ॥१॥

नाना लोक नाना स्वभावे । काळेबेरे उजवे डावे। सर्वांचे नीट राखावे । अवधान ॥२॥

छोटे मोठे जुने नवीन । सर्वाशी जुळवावी धून । कोणासही न म्हणावे हीन । निष्ठेमुळे ॥३॥

पूर्वग्रह धरू नये । आपलीच पुंगी वाजवू नये । सतरा फाटे फोडू नये । विचारात ॥४॥

प्रेमाशिवाय रागवू नये । उगीच जास्त लाडवू नये । कधीच कोणाचे दुखवू नये । कोमल मन ।।५।।

नेहमी गोड बोलावे । स्पष्ट विचार मांडावे। पण तत्पूर्वी स्थान, लोक पहावे । मग बोलावे ॥६॥

स्वतः टीका करू नये । परनिंदा मनात ठेवू नये । स्वतःचे वागणे व्हावे । शक्यतो निर्दोष ।।७।।

आपला उत्साह दिसावा । लोकांचा वाढवावा । एक एक उभा करावा । कार्यकर्ता ॥८॥

वेळ लागेल हरकत नाही । फळ उशिरा मिळेल काही। पण संच उभा करणे पाही। नेहमीच ।।९।।

एकटाच खप खप खपला । मागे कोणी नाही उरला । जसा पाण्याबरोबर मुरला । बुडबुडा ।१०।।

म्हणून मुख्य संच करा । क्षणिक लाभ न मनी धरा । हळू हळू पण पक्का भरा । पाया कामाचा ॥११॥

काम करता उत्साह वाढे । आमच्या निश्चयाचे घोडे । नेहमीसाठी पुढे पुढे । पुढेच धावावे ।।१२।।

वाट घेतली पुण्ण्याची । जरी अवघड तरी पराक्रमाची । ती कधी न व्हावी । परतीची ।।१३।।

वाचन श्रवण मनन । असो नियमित जीवन । योग्य शरीर बुद्धी मन । याने घडे ॥१४॥

परंतु हे सर्व काही । झेपते त्यापेक्षा थोडे अधिक साही। म्हणजे त्याचा योग्य होई । परिणाम ।।१५।।

लोकांपेक्षा फार वेगळे नसावे । अगदी लोकांसारखे न व्हावे। मर्यादा राखून वागावे । सर्वाशी ॥१६॥

 प्रत्येकाकडून शिकावे । अनावश्यक ते टाकून द्यावे । डोळे उघडे ठेवून पहावे । सर्व लोक ।॥१७॥

असो काय लिहू अधिक । सूज्ञ जाणत्यांना अधिक । तुमच्यापासून घेतले एक । तेच लिहिले ।॥१८॥।

मा. डॉ. मोहन मधुकर भागवत सरसंघचालक, राष्ट्रीय स्वयंसेवक संघ